Јеменскиот фронт ја разгорува кризата на Блискиот Исток
Нов бран напади на Хутите врз Саудиска Арабија и растечките тензии околу Баб ел-Мандеб и Ормускиот теснец ја зголемуваат опасноста за клучните светски поморски рути и го потресуваат енергетскиот пазар.
Разгорува јеменскиот фронт на Блискиот исток. Проиранските Хути извршија ракетни и напади со дронови врз цели во Саудиска Арабија и зазедоа нови стратешки позиции во близина на теснецот Баб ел-Мандеб во јужниот дел на Црвено Море, зајакнувајќи ја контролата врз важната поморска рута.
„Јеменските вооружени сили ќе продолжат со своите воени операции длабоко во Саудиска Арабија сè додека продолжува агресијата против нашиот народ. Секоја нова агресија ќе биде одговорена со пошироки и поинтензивни операции“, изјави портпаролот на војската на Хутите, бриг. генерал Јахја Сари.
Ријад соопшти дека е погоден клучен нафтовод, за чија обнова ќе бидат потребни недели, и возврати со воздушни удари врз позиции на Хутите во Јемен. Иран ги отфрли американските обвинувања за вмешаност во нападите, додека Кина ги осуди како неприфатливи и повика на воздржаност и дијалог.
„Нападите врз цивилната инфраструктура што е важна за егзистенцијата на луѓето се неприфатливи. Зголемената нестабилност во регионот не е во интерес на ниту една страна“, изјави портпаролот на министерството за надворешни работи на Кина, Гуо Џиакун.
Во меѓувреме, на неопределено време е одложен и состанокот меѓу Иран и заливските држави за Ормускиот теснец. Техеран тврди дека Саудиска Арабија побарала одложување на состанокот во Оман, кој требаше да прецизира безбедна пловидба низ протокот.