БРТ-проектот пред одобрување од ЕБОР, тендерот се очекува во наредните денови

Проектот за брз автобуски превоз (БРТ) во Скопје е во последната фаза на одобрување од Европската банка за обнова и развој (ЕБОР), а тендерот за проектирање и изведба се очекува да биде распишан во наредните неколку дена, информира градоначалникот Орце Ѓорѓиевски.

Од Град Скопје посочуваат дека до ЕБОР е доставена потребната документација и се очекува официјален одговор до крајот на неделава, по што би следувало објавување на јавниот повик. Тендерската постапка ќе се спроведува согласно европските регулативи.

Според најавите, по завршувањето на тендерската постапка и изборот на изведувач, градежните работи би можеле да започнат доцна напролет следната година. Од Градот велат дека при реализацијата на БРТ-системот ќе биде зачувано постојното средишно зеленило на булеварите.

Ѓорѓиевски информираше и за проектот за ставање во функција на мостот на улицата „Љубљанска“. Со него треба да се воспостави нова сообраќајна врска меѓу улиците „Љубљанска“ и „Скупи“, со што, според најавите, ќе се подобри поврзаноста на Карпош со северниот и западниот дел од Скопје, како и пристапот кон Бардовци и Злокуќани.

Проектот, како што посочи градоначалникот, треба да придонесе и за растоварување на постојните сообраќајни правци.