Енергетската заедница позитивно го оцени напредокот на Македонија во обновливите извори

Македонија го надминала планираното темпо во развојот на инсталираните капацитети за производство на електрична енергија од обновливи извори, покажува последниот извештај на Енергетската заедница. Министерството за енергетика, рударство и минерални суровини навреме го доставило извештајот за напредокот во спроведувањето на Националниот план за енергија и клима.

Според извештајот за оценка на националните планови за енергија и клима за периодот 2025–2030 година, позитивно е оценет напредокот на земјава во исполнувањето на преземените енергетски и климатски обврски.

Најзначаен придонес во енергетската транзиција имаат фотонапонските и хидроенергетските капацитети. Од Министерството посочуваат дека динамиката на развој на обновливите извори веќе ги надминува националната цел и индикативната траекторија утврдени со Националниот план.

До 2030 година е предвидено 38 проценти од бруто финалната потрошувачка на енергија да биде од обновливи извори, со раст на уделот во производството на електрична енергија, греењето и ладењето и транспортот.

Во наредниот период, како приоритети се наведуваат намалувањето на примарната енергетска потрошувачка, понатамошниот развој на обновливите извори и унапредувањето на енергетската ефикасност.

Министерството најавува и мерки за пазарно поврзување, активно учество на потрошувачите, сопствено производство и потрошувачка на електрична енергија, развој на енергетски заедници, системи за складирање енергија и воведување паметни мерни системи.

Целта, како што се наведува, е поголема енергетска сигурност, зголемување на домашното производство од обновливи извори и создавање поефикасен и модерен енергетски систем.