СВР Скопје ја откри и санкционираше жената која фрлаше отпадоци во Лепенец
Жената е идентификувана по видеоснимки објавени на социјалните мрежи, а санкционирана е и за непрописно паркирање.
СВР Скопје ја идентификува и санкционираше 38-годишната М.И.Б. од Скопје, која според МВР е лицето снимено како со автомобил „порше“ фрла отпадоци во реката Лепенец, кај мостот на улицата „Скупи“.
Од МВР информираат дека жената денеска во 11:45 часот била повикана во Полициската станица од општа надлежност Карпош, каде со неа бил извршен службен разговор.
По документирањето на случајот, на жената ѝ е изготвен платен налог согласно Законот за јавна чистота поради фрлање амбалажа надвор од места определени за таа намена.
Дополнително, изготвен е и записник со платен налог согласно Законот за безбедност на сообраќајот на патиштата, поради непрописно паркирање на возилото на коловозна лента.
Случајот следува по видеоснимките објавени на социјалните мрежи на кои се гледа како женско лице фрла отпадоци во Лепенец.