Тензии на Косово по пресудата за поранешните лидери на ОВК

17.09.2026 20:05

Растат политичките и општествените тензии на Косово по пресудата за четворицата поранешни лидери на ОВК. По протестите во Приштина, ветераните за утре најавија национален протест. Косовските лидери ја оспоруваат одлуката, Белград реагира, а меѓународната заедница повикува на почитување на пресудата и избегнување реторика што може дополнително да ги разгори тензиите.

Пресудата на Хашкиот суд, со која четворицата поранешни лидери на ОВК заработија 81 година затворска казна, високо ги подигна политичките и општествените превирања на Косово. Останува ризикот од провокации, локални немири, но и стравувањата од прелевање.

По вчерашните насилни протести пред косовската Влада и седиштето на ЕУЛЕКС во Приштина, Организацијата на ветерани од поранешната Ослободителна војска на Косово за утре најави национален протест. Според нив, со пресудата во Хаг се намалува значењето на нивната борба за ослободување. Најавија создавање координативен совет и платформа што ќе ги вклучи и Албанците кои живеат надвор од границите на Косово. Незадоволство и кај косовските политичари.

„Строгата казна изречена за четворицата поранешни лидери на ОВК е неприфатлива, неправедна и предизвикува огромна штета. Оваа пресуда апсолутно мора да биде поништена и да се преиначи во жалбената постапка. Во овие тешки моменти ние сме со семејствата на поранешните лидери на ОВК“, изјави премиерот на Косово, Албин Курти.

Реакција по одлуката на Хаг и од српскиот претседател Вучиќ. Незадоволен е што пресудата не ги опфаќа и злосторствата извршени врз Србите и по 1999 година.
 
„Злосторствата против човештвото не се опфатени со пресудата. Сите шест точки од обвинението беа целосно отфрлени, бидејќи Судот утврди дека нападите биле насочени кон поединци, а не кон поширокото население. Сите злосторства извршени врз Србите по 20 јуни 1999 година не беа земени предвид – а не заборавајте дека некои од нив се од најтешка можна природа“, рече српскиот претседател, Александар Вучиќ.
 
САД, ЕУ и Велика Британија повикаа да се почитува хашката пресуда за четворицата поранешни лидери на ОВК. И еврокомесарката Кос е децидна дека одлуката на Судот мора да се почитува, потсетувајќи дека осудените имаат право на жалба. Меѓународната заедница апелира да се избегнува реторика што би поттикнувала тензии.
 
Маја Стојанова