Три лица лишени од слобода за предизвикување пожар на депонијата кај Буково

Три лица се лишени од слобода поради сомнение дека предизвикале пожар на депонијата кај Буково, во близина на Охрид. Случајот е пријавен во полицијата, а по неговото целосно документирање ќе следува кривична пријава.

Од СВР Охрид информираат дека на 17 септември во 19:30 часот, полициски службеници ги лишиле од слобода Ф.А. (27) од Кавадарци, Е.И. (31) од Штип и Е.Н. (38) од Струга.

Тие биле затекнати по претходна пријава дека на депонијата запалиле поголема количина кабли. Во близина на депонијата полицијата забележала и товарно возило „Ивеко“ со струшки регистарски ознаки, натоварено со кабли и друг материјал.

По целосно расчистување и документирање на случајот, против трите лица ќе биде поднесена кривична пријава согласно член 288 од Кривичниот законик – „Предизвикување општа опасност“.