20 пожари на отворен простор во изминатото деноноќие
Три пожари и натаму се активни на територијата на Македонија, два се ставени под контрола, а 15 се целосно изгаснати. Според Центарот за управување со кризи, активни се пожарите во Кривогаштани, ресенското село Евла и кумановското село Пчиња.
Во периодот од 18 до 19 септември, до 07:30 часот, на територијата на Македонија биле регистрирани вкупно 20 пожари на отворен простор, соопшти Центарот за управување со кризи (ЦУК).
Од нив, три пожари сè уште се активни, два се ставени под контрола, а 15 пожари се целосно изгаснати во изминатите 24 часа.
Активни се пожарите во Кривогаштани, на потегот меѓу селата Подвис и Кривогаштани, каде гори ниска вегетација, во ресенското село Евла, каде што се зафатени ѓубре и ниска вегетација, како и во кумановското село Пчиња, каде што огнот зафатил ниска вегетација и отпад.
Два пожари се ставени под контрола. Едниот е на подрачјето меѓу Македонски Брод и Сопиште, кај селото Белица, во месноста Кајорец, со ширење кон Јасен. Таму пожарот зафатил нискостеблеста и мешана шума.
Под контрола е и пожарот на територијата на Општина Ново Село, во близина на селото Бадилен, каде што гори шумска површина.
Во текот на изминатото деноноќие, пожарникарските и надлежните екипи изгаснале вкупно 15 пожари на отворен простор. Пожари биле регистрирани и локализирани на подрачјата на Скопје, Битола, Дебар, Штип, Карбинци, Виница, Берово, Куманово, Ранковце и Тетово.
Од ЦУК информираат дека состојбата на теренот продолжува да се следи, а надлежните институции и служби ги координираат активностите за справување со пожарите.