Мицкоски: Продолжуваме да го јакнеме македонско-американското стратешко партнерство

Премиерот Христијан Мицкоски информира дека во Њујорк разговарал со државниот секретар на САД, Марко Рубио.

Како што објави Мицкоски, разговорите, според него, имаат особено значење и претставуваат потврда на важноста на стратешкото партнерство и континуираниот политички дијалог со САД.

Тој посочи дека на средбата биле разменети ставови за прашања од заеднички интерес, продлабочување на билатералните односи и натамошно зајакнување на позицијата на Македонија како стабилен и доверлив сојузник.

Мицкоски оцени дека во период на сериозни геополитички предизвици, силните партнерства и отворениот дијалог со стратешките сојузници имаат уште поголема тежина.

„Македонија има јасни државни интереси и продолжува достоинствено и принципиелно да ги застапува заедно со нашите стратешки партнери“, наведе Мицкоски, додавајќи дека продолжуваат напорите за јакнење на македонско-американското стратешко партнерство и создавање нови можности.