„Патување низ звуците“ – македонска музика и класични дела на концерт во Истанбул

Македонскиот културен центар во Истанбул на 23 септември ќе биде домаќин на концертната вечер „Патување низ звуците“, на која ќе настапат сопранот Дајана Малолари Пајазити, виолинистот Шкелзен Пајазити и пијанистката Едита Руси.

Концертната програма е замислена како музичко патување низ различни епохи, стилови и музички традиции, со дела од Тодор Скаловски, Антонин Дворжак, Винченцо ди Кјара, Франц Лехар, Јохан Себастијан Бах, Родолфо Фалво и Дмитриј Шостакович.

Концертот ќе започне во 19 часот, а на публиката ќе ѝ понуди камерна музичка програма во изведба на тројца музичари со богато концертно и педагошко искуство.

Виолинистот Шкелзен Пајазити, роден во Тетово, е професор по виолина во Државното музичко училиште „Тодор Скаловски – Тетоец“ во Тетово и во Општинското музичко училиште во Гостивар. Има настапувано на повеќе солистички и камерни концерти во земјата и странство, а од 2015 година го раководи Меѓународниот музички фестивал „Меридијани“.

Сопранот Дајана Малолари Пајазити, родена во Тирана, дипломските и магистерските студии ги завршила на Универзитетот за уметности во Тирана. Таа денес е професорка по соло пеење во ДМУ „Тодор Скаловски – Тетоец“ и на Факултетот за уметности при Универзитетот во Тетово, а има настапувано и на повеќе меѓународни фестивали и натпревари.

Пијанистката Едита Руси, родена во Скопје, дипломирала и магистрирала на Факултетот за музички уметности во Скопје во класата на м-р Симон Трпчески. Има добиено повеќе награди на државни и меѓународни натпревари и настапувала на фестивалите „Скопско лето“, „Златна лира“ и „Денови на македонската музика“. Од 2009 година работи како наставник по пијано во ДМБУЦ „Илија Николовски – Луј“.

Настанот е отворен за љубителите на класичната музика и има за цел преку камерна концертна програма да ја претстави македонската култура и музичко творештво пред публиката во Истанбул.