МВР ќе се вклучи во контролата на боледувањата, се подготвуваат построги правила

Полицијата ќе се вклучи во контролата на боледувањата. Министерот Тошковски вели – со години има злоупотреби од вработените и во јавниот и во приватниот сектор. За нивно откривање потребен е подобар институционален одговор, но проверките мора да се спроведуваат со почитување на законите и човековите права.

„Сите тие процесни чекори кои треба да ги преземеме институционално мора да бидат согласно Устав, закон, европска конвенција за човекови, слободи и права, сите меѓународни конвенции. Во ниту еден случај не почитувајќи и кршејќи ги човековите права и сигурен сум дека која и да биде одбрана постапка да се спроведе институционално, со употреба на технологија, ќе биде согласно потребните стандарди и начела“, изјави министерот Тошковски.

Фондот за здравство подготвува построги правила за користење боледувања. Со МВР работат на систем за размена на податоци, со кои би се откривале можни злоупотреби – вклучително и лице кое користи боледување ја напуштило државата. Министерот Клековски смета дека за проверка на движење потребно е законско решение.

„Ние имаме ситуации каде што имаме луѓе кои се на боледување, а на Инстаграм се сликаат на одмор во Италија. И по тоа не може да се постапи, сметате дека тоа е заштита на правата на работникот. А во однос на контролата на движење, сметам дека тоа треба да се уреди со закон“, нагласи министерот Клековски.

Меѓу предложените мерки е намалување на периодот за кој матичните лекари можат да отворат боледување од седум на пет дена, како и можност контролори да проверуваат дали лицето кое е на боледување се наоѓа домашна адреса. Предлог-измените на правилникот за боледување во понеделник ќе ги разгледува Управниот одбор на Фондот.

Андријана Ѓурческа