Стојкоски: ДПИ почна со системско отстранување на утврдените недостатоци
Директорот на Државниот пазарен инспекторат, Стојкоски, вели дека по стапувањето на должност побарале ревизија на работењето на институцијата и почнале со надминување на утврдените слабости. Тој нагласува дека извештајот на Државниот завод за ревизија се однесува на периодот 2023–2024 година, додека активностите за отстранување на недостатоците се започнати од 2025 година.
Државниот пазарен инспекторат од 2025 година презема активности за надминување на слабостите утврдени во извештајот на Државниот завод за ревизија, соопшти директорот Стојкоски.
Тој посочува дека по стапувањето на должност биле согледани низа предизвици во функционирањето на институцијата, поради што било побарано спроведување независна ревизија.
Во фокусот на активностите се зајакнувањето на човечките капацитети, подобрувањето на финансиската и материјалната евиденција, унапредувањето на инспекциските постапки и дигитализацијата.
ДПИ, со поддршка од ЕУ, работи и на ново системско-софтверско решение што треба да ги опфати работните процеси во институцијата.
Од Инспекторатот информираат дека се преземаат мерки и за подобрување на контролата на безбедноста на производите и создавање услови за континуирани лабораториски испитувања.
Стојкоски вели дека ДПИ ги прифаќа препораките на ДЗР како основа за дополнително унапредување на работењето и останува посветен на нивно целосно спроведување.