Пукна топловодна цевка, поплавена зградата на „Нова Македонија“
Пукната топловодна цевка предизвика поплава во зградата на „Нова Македонија“, каде што се сместени министерства, ДИК и други институции. Струјата во објектот е исклучена. Според првичните проценки, за санација и нормализација на состојбата ќе бидат потребни неколку денови. Ќе се проценува и штетата.
Зградата на „Нова Македонија“ остана без струја. Превентивно е исклучена поради поплавата во објектот, каде што се сместени повеќе државни институции – Министерствата за образование, за Јавна администрација, за Локална самоуправа, Просветниот инспекторат, ДИК.
Топловодна цевка ноќеска околу 12 часот пукнала на вториот кат во зградата, веднаш реагирало обезбедувањето и струјата била исклучена, бидејќи водата течела и по електричната инсталација. Од СОЗР велат дека работат на санација и дека струјата ќе биде пуштена откако ЕВН ќе даде одобрување. Се очекува санацијата да трае пет до шест дена.
Во вакви услови, објектот не може да функционира. Водата навлегла и во електрособата, а потребно е и да се исуши влагата.
Екипи на јавните претпријатија и техничките служби и натаму се на терен. По испумпувањето на водата и санацијата на пукнатата цевка, ќе се врши проценка на материјалната штета.
Наташа Јанчиќ-Менковски