„Макфест“ по 41. пат на 30 и 31 октомври во Штип
На сцената ќе се претстават докажани автори и нови изведувачи, со композиции во различни музички изрази.
Штип на 30 и 31 октомври ќе биде домаќин на 41. издание на фестивалот на забавни мелодии „Макфест“. На сцената ќе се претстават докажани автори и нови изведувачи, со композиции во различни музички изрази.
Годинашното издание на „Макфест“ носи спој на децениско фестивалско искуство и нова енергија. Организаторите најавуваат разновидна музичка програма и песни со певливи рефрени, кои, како што велат, имаат амбиција да останат присутни во домашниот радиоетер и по завршувањето на фестивалските вечери.
Уметничкиот директор на фестивалот, Роберт Саздов, вели дека годинашниот концепт се темели на силен авторски печат и композиции со различен карактер.
„Годинава имаме навистина интересен избор на автори – докажани музички имиња, автори со свој препознатлив стил и песни зад кои стои големо искуство. Очекувам и ова издание да донесе убави, певливи песни и композиции со различен карактер, од оние што лесно влегуваат во уво до песни кои ќе се слушаат и по фестивалските вечери. Тоа е и убавината на Макфест“, вели Саздов.
Со 41. издание, штипскиот фестивал ја продолжува повеќедецениската традиција, а новите композиции ќе бидат претставени пред публиката на 30 и 31 октомври.