Андоновски: Регионалната соработка може да привлече повеќе инвестиции во вештачката интелигенција

Министерот за дигитална трансформација Стефан Андоновски на самитот „Импакт“ во Букурешт порача дека земјите од Југоисточна Европа преку заедничка инфраструктура, примена на вештачката интелигенција и олеснето движење на таленти и компании можат да создадат попривлечни услови за инвестиции и технолошки развој.

Андоновски учествуваше на панелот „Европската сувереност во вештачката интелигенција: може ли ЕУ да биде конкурентна и да предводи?“, заедно со претставници на владите на Романија и Полска, пратеници во Европскиот парламент и директори на меѓународни компании од телекомуникацискиот и банкарскиот сектор.

Тој истакна дека европската конкурентност ќе зависи од способноста вештачката интелигенција да се примени во економијата и јавниот сектор, со истовремени инвестиции во инфраструктурата и развој на вештини.

Според Андоновски, земјите од регионот имаат релативно мали пазари поединечно, но преку регионална соработка можат да понудат поголем пазар, квалификуван инженерски кадар, конкурентни трошоци и развиена дигитална инфраструктура.

Како приоритетни области за соработка тој ги посочи заедничката инфраструктура, заедничките примери за примена на вештачката интелигенција и полесното движење на таленти и компании.

Андоновски нагласи дека европската регулатива е важна за воспоставување доверба и јасни правила, но дека следниот чекор треба да биде забрзана примена на технологијата и поддршка на иновациите.