Бил Гејтс: Следните пет години ќе бидат критични за ризиците од вештачката интелигенција

Коосновачот на „Мајкрософт“, Бил Гејтс, предупреди дека доколку не бидат преземени неопходните мерки, биолошките, кибернетичките и психосоцијалните ризици од вештачката интелигенција би можеле да се појават побрзо од нејзините придобивки. Според него, следните пет години ќе бидат критични.

Гејтс за „Њујорк тајмс“ зборуваше за иднината на вештачката интелигенција во период кога во САД расте загриженоста поради ризиците што може да ги донесе брзиот развој на технологијата, а дел од лидерите во индустријата повикуваат на забавување на нејзиниот развој.

Тој посочи дека вештачката интелигенција, за разлика од човечката, не е ограничена од биолошките способности. Човечкиот мозок има ограничена меморија и физички капацитет, додека вештачката интелигенција не се соочува со истите ограничувања.

Гејтс оцени дека можноста вештачката интелигенција во иднина да ја надмине човечката интелигенција предизвикува загриженост.

„Никогаш досега немало производ за кој толку малку се разбира и за кој толку малку се знае што сè може да направи“, рече Гејтс.

Тој смета дека ризиците од вештачката интелигенција не се однесуваат само на иднината и предупреди дека и сегашните системи имаат способности што би можеле да бидат злоупотребени од лица со злонамерни намери за биолошки и кибернетички напади.

Гејтс предупреди дека вештачката интелигенција би можела да биде злоупотребена за биотерористички напади, како и за олеснување кибернетички напади насочени кон дигиталните системи и инфраструктурата. Според него, дополнителен ризик претставува можноста за заобиколување на безбедносните механизми кај моделите со отворен код.

Тој посочи дека во иднина би можел да се појави и ризик системите за вештачка интелигенција да ги толкуваат зададените наредби на неочекуван начин и да дејствуваат спротивно на човечките интереси.

Гејтс смета дека свеста за ризиците од вештачката интелигенција надвор од технолошкиот сектор сè уште е на ниско ниво.

Тој нагласи дека итно се потребни механизми што ќе ја контролираат употребата на системите за вештачка интелигенција, посочувајќи дека сегашните системи немаат доволно нивоа на надзор.

„Не можете да се потпрете на тоа индустријата самата да се надгледува“, рече Гејтс.

Според Гејтс, вештачката интелигенција досега создала значителен број работни места, особено поради големата побарувачка за работници потребни за изградба на податочни центри и развој на инфраструктурата за вештачка интелигенција.

Тој истакна дека фактот што технологијата може да изврши одредена работа по пониска цена од човекот не значи дека таа работа нужно треба да ѝ биде препуштена на вештачката интелигенција.

„Тоа што економските показатели покажуваат дека користењето вештачка интелигенција е поевтино, не значи дека општеството мора да го направи тоа“, рече Гејтс.

Тој нагласи дека конечната одлука за ова прашање треба да ја донесе општеството.

Гејтс смета дека вештачката интелигенција може да донесе особено големи придобивки за земјите со ниски приходи и дека развојот и примената на оваа технологија во тие региони треба да се одвиваат што е можно побрзо.

Според него, вештачката интелигенција може да биде алатка што ќе им помогне на луѓето, особено на оние на кои им е најпотребна помош, во решавањето на основните животни проблеми.

Како можни ризици во иднина, Гејтс ги наведе зголемувањето на бројот на биотерористички инциденти и губењето работни места поради вештачката интелигенција.

„Веројатно ќе мора да го минимизираме нивното влијание во текот на транзициски период што ќе трае повеќе од 20 години“, рече тој.

Во исто време, Гејтс смета дека во текот на овој период вештачката интелигенција може да донесе огромен напредок што луѓето директно ќе го почувствуваат во секојдневниот живот.

Сепак, тој предупреди дека доколку навреме не се преземат неопходните мерки, биолошките, кибернетичките и психосоцијалните ризици би можеле да се појават побрзо од придобивките од вештачката интелигенција. Според него, следните пет години ќе бидат особено важни.

Гејтс нагласи дека одлуките за насоката во која ќе се развива технологијата остануваат во рацете на луѓето.

„Иако е тешко една земја самостојно да одлучи да ја забави, запре или целосно да ја отстрани вештачката интелигенција, луѓето можат да донесат таква одлука. Секако, тоа ќе донесе и одредени политички предизвици“, рече Гејтс.

Тој додаде дека дури и отстранувањето на податочните центри не би било доволно за да се запре или значително да се забави развојот на вештачката интелигенција.

Гејтс смета дека државите можат многу да научат една од друга кога станува збор за регулирањето и употребата на вештачката интелигенција.

Тој посочи дека Кина вовела ограничувања за социјалната интеракција на младите корисници со системи за вештачка интелигенција.

„Дали тие знаат нешто што ние не го знаеме? Можеме ли да ги разгледаме резултатите од различните експерименти? Во следниот период ќе мора да научиме многу за ова прашање“, рече Гејтс.

Тој предупреди дека ќе биде многу тешко да се бранат придобивките од вештачката интелигенција доколку не бидат воспоставени соодветни безбедносни механизми, особено против кибернетички и биолошки напади.