Autechre вечерва првпат пред македонската публика во МКЦ
Британското електронско дуо Autechre вечерва за првпат ќе настапи во Скопје, во Младинскиот културен центар. Концертот ќе се одржи во целосен мрак, со посебен безбедносен протокол, а на програмата се и MDX на Andy Maddocks и македонскиот музичар Александар Ордев.
Британското електронско дуо Autechre вечерва за првпат ќе настапи пред македонската публика во Младинскиот културен центар во Скопје.
Покрај Sean Booth и Robert Brown, на концертната програма се и MDX, диџеј-проектот на Andy Maddocks, како и македонскиот музичар Александар Ордев.
Од „ROTK books&music“ најавуваат дека една од особеностите на настапите на Autechre е тоа што концертите се одвиваат во целосен мрак и според посебен безбедносен протокол. На тој начин вниманието на публиката е насочено исклучиво кон звукот.
Autechre важат за едни од влијателните имиња на современата експериментална електронска музика. Дуото од Манчестер е активно од почетокот на 1990-тите и зад себе има повеќе од три децении музичка кариера и бројни изданија, со значително влијание врз развојот на електронската и IDM-сцената.
Настапот во Скопје е дел од нивната концертна агенда за 2026 година, по распродадената турнеја во 2025 година и серијата концерти низ Европа и Јапонија.