Грејната сезона во Скопје почнува утре, два дена пред официјалниот термин

Грејната сезона 2026/2027 за потрошувачите приклучени на системите за централно греење во Скопје почнува утре, 13 октомври, два дена пред официјалниот термин. Од АД ЕСМ информираат дека се исполнети условите за производство, испорака и снабдување со топлинска енергија.

Според податоците на Управата за хидрометеоролошки работи, за утре е прогнозирана средна надворешна температура од 12 степени Целзиусови. Согласно регулативата, грејната сезона може да почне пред 15 октомври доколку прогнозата за средната надворешна температура за наредниот ден е еднаква или пониска од 12 степени.

Во октомври и во првата половина на ноември, испораката на топлинска енергија ќе се регулира во зависност од временските услови и температурите во текот на денот. Кога температурите ќе бидат пониски, испораката ќе се зголемува, а при повисоки температури ќе се намалува или привремено ќе се прекинува, во согласност со утврдените услови.

Од ЕСМ ги повикуваат потрошувачите да ги завршат подготовките на внатрешните грејни инсталации, чие одржување е нивна обврска. Заедниците на сопственици треба да обезбедат непречен пристап до топлинските потстаници, редовно електрично напојување и функционални електрични инсталации.

Потрошувачите можат да пријават дефекти и да известат за завршени интервенции во Центарот за грижа на потрошувачи на ЕСМ Снабдување, на телефонските броеви 02 3076 200 и 075 400 100. Корисниците на ЕСМ Енергетика можат да се јават на 02 3104 816 и 02 3104 872.