19 години од трагичната смрт на Тоше Проески – маратон во негова чест
Деветнаесет години од трагичната смрт на Тоше Проески, Македонија и Балканот ја чуваат спомената за музичката легенда. Во негова чест, 14 маратонци тргнаа од Нова Градишка кон Крушево, продолжувајќи ја традицијата што ги поврзува двата града.
Утрото на 16 октомври 2007 година, Балканот го потресе веста за смртта на дваесет и шестгодишниот Тодор Проески. Македонија и Балканот денеска се сеќаваат на Тоше Проески, кој пред 19 години го загуби животот во сообраќајна несреќа во близина на Нова Градишка, Хрватска, на пат кон Загреб.
Во негова чест, и годинава се одржува традиционалниот маратон од Нова Градишка до Крушево. Четиринаесет маратонци учествуваат на 19. издание на овој спортски настан посветен на музичката легенда. Тринаесетмина го започнаа патувањето од Хрватска, а уште еден учесник ќе им се приклучи на македонска територија.
Маратонците во Хрватска ќе истрчаат околу 200 километри, додека низ Србија ќе патуваат со возила, согласно тамошните прописи. По влезот во Македонија, македонските маратонци ќе го преземат трчањето и ќе поминат уште околу 220 километри до Крушево.
Стартот на маратонот беше одбележан пред спомен-обележјето на Тоше во Нова Градишка. Пристигнувањето во Крушево е предвидено за денеска, на годишнината од неговата смрт.
Крајната дестинација е Гумење, каде што се наоѓа вечното почивалиште на Тоше Проески. Со овој маратон, учесниците уште еднаш му оддаваат почит на пејачот чии песни и хуманост продолжуваат да живеат во сеќавањата на публиката.