ДИК: Излезеноста во Брвеница до 15 часот изнесува 31,17 проценти, гласале 5.064 избирачи
На предвремените избори за градоначалник на Општина Брвеница до 15 часот гласале 5.064 граѓани, односно 31,17 проценти од запишаните избирачи. Од Државната изборна комисија (ДИК) информираат дека изборниот процес се одвива непречено, без забележани поголеми неправилности.
Според податоците на ДИК, гласањето се спроведува на сите 24 избирачки места во општината.
Во споредба со првиот круг од локалните избори во 2025 година, кога до 15 часот своето избирачко право го искористиле 4.932 граѓани, излезеноста е зголемена за 0,62 процентни поени.
Од Комисијата соопштија дека до попладневните часови се поднесени седум приговори поврзани со остварувањето на избирачкото право. Од нив, два се усвоени, со што на избирачите им е овозможено да гласаат, еден приговор е одбиен како неоснован, додека преостанатите четири се во постапка на разгледување.
Следните податоци за излезеноста ДИК ќе ги објави во 18:30 часот, а ќе се однесуваат на гласањето заклучно со 18 часот.
Жителите на Брвеница денеска избираат нов градоначалник на предвремени локални избори, распишани по смртта на досегашниот градоначалник Јовица Илиевски, кој почина на 23 јуни годинава.
Во Избирачкиот список се запишани вкупно 16.256 избирачи од десет населени места во општината. Од нив, 449 се евидентирани како лица на привремена работа во странство, додека девет се наоѓаат во затвор или притвор.