Од ноември нови стандарди во платниот промет, броевите на сметките остануваат исти

Од ноември почнува примената на новите стандарди во националниот платен промет, кои предвидуваат промени во платните налози, ознаките за целта на плаќањето и начинот на означување на платежните сметки, информира Македонската банкарска асоцијација (МБА).

Промените произлегуваат од Законот за платежни услуги и платни системи и од соодветните подзаконски акти на Народната банка, а се дел од процесот на модернизација на платните системи во земјава.

Од МБА појаснуваат дека за граѓаните и компаниите најважно е што броевите на постојните платежни сметки остануваат исти. При плаќањето, сметките ќе се користат во ИБАН-формат, со додавање на ознаката МК07 пред постојниот број. Приспособувањето на електронското и мобилното банкарство ќе го извршат банките.

Со новите стандарди ќе се воведат и стандардизирани платни налози, кои ќе ги заменат досегашните обрасци ПП10, ПП30, ПП40, ПП50 и ПП53. Тие ќе се користат и во хартиена и во електронска форма.

Промени ќе има и кај ознаките за целта на плаќањето. Досегашните нумерички шифри ќе бидат заменети со нови четиризнаковни ознаки, со цел попрецизно наведување на намената и подобра бработка на податоците.

Компаниите што користат автоматизирана размена на налози, сметководствени системи и други интегрирани решенија, доколку има потреба од технички приспособувања, ќе добијат информации од своите банки.

Од Македонската банкарска асоцијација ги повикуваат граѓаните и компаниите да ги следат известувањата и упатствата што ќе ги објавуваат банките за користењето на ИБАН, новите платни налози и останатите промени.

Целта на новите стандарди е подобрување на квалитетот на податоците и поефикасна обработка на платежните трансакции, без прекини во користењето на платежните услуги.