Бензините поевтинуваат за 2,5 денари, дизелот поскапува за 2 денари
Од полноќ бензините ЕУРОСУПЕР 95 и 98 ќе се продаваат пониски за 2,5 денари за литар, додека дизелот и екстра лесното масло за домаќинство поскапуваат за 2 денари. Регулаторната комисија за енергетика ги утврди новите максимални цени што ќе важат од 20 октомври.
Бензините поевтинуваат за 2,5 денари за литар, а дизелот поскапува за 2 денари, согласно најновата одлука на Регулаторната комисија за енергетика (РКЕ). Со одлуката, литар ЕУРОСУПЕР БС-95 ќе се продава за најмногу 96 денари, а ЕУРОСУПЕР БС-98 за 98 денари. Цената на ЕУРОДИЗЕЛ ќе изнесува 99 денари за литар.
Екстра лесното масло за домаќинство поскапува за 2 денари и ќе чини 110,50 денари за литар, додека мазутот поскапува за 1,837 денари за килограм, со нова цена од 53,579 денари.
Од РКЕ информираат дека малопродажните цени на нафтените деривати во просек се зголемуваат за 0,49 проценти во однос на претходната одлука од 13 октомври.
Во пресметката се земени предвид движењата на референтните цени на светскиот пазар, курсот на доларот и владините мерки за намалување на ДДВ за дизелот на 10 проценти и намалување на акцизата за 4 денари за литар кај бензините и дизелот.
РКЕ појаснува дека утврдените цени се максимални, што значи дека трговците можат да ги продаваат горивата и по пониски цени.