Почна вакцинацијата против сезонски грип
Со првите 30 илјади дози, почна вакцинацијата против сезонскиот грип. Бесплатната имунизација ќе ги покрие ризичните категории граѓани. За да ги увери граѓаните во безбедноста, се вакцинираше и министерот Клековски...
Почна превенцијата против сезонски грип. Се имунизираат хронично болните, повозрасните, бремените жени и здравствените работници.
„Веќе четири години се вакцинирам, до сега е добро. Не сум имала ниту грип, ниту настинки, ништо“, вели една граѓанка.
„Немам проблеми, ниту реакции од вакцината, не сум боледувал, грип не ме фатил“, додава друг граѓанин.
Интересот е голем, пријавени се над 55 илјади граѓани, а засега има само 30 илјади јужнокорејски вакцини обезбедени преку заем. Пријавените добиваат смс порака кога и каде да се јават за имунизација.
„Повеќето се дојдени на терминот. Оние кои не биле во можност да дојдат на терминот можат да го искористат во наредните недела до две. Или доколку имале некоја болест или акутна инфекција може да се пролонгира“, д-р Сања Цилевска Младеновска – вакцинален пункт „Бит пазар“.
Но, сезоната на грип почна пред вакцинацијата – за две недели институтот за јавно здравје регистрира два потврдени случаи со грип и уште 65 со симптоми слични на грип. Лекарите велат вакцината е најефикасен начин за превенција, штити од тешки форми на болеста, хоспитализација и смртен исход.
„Ова е најдобро време да бидат вакциниран. Почетокот е соодветен од причина што за недела до две се очекува сите оние коишто ќе ја добијат вакцината, ќе стекнат имунитет“, д-р Марија – директорка на Институтот за јавно здравје.
„Пациентите кои имаат респираторни хронични заболувања да се вакцинираат, бидејќи имаме страшни гужви во декември и јануари, пациентите да го заштитат здравјето, за жал тогаш се зголемува бројот на смртни случаи“, д-р Димитар Каркински – директор на Институтот за туберкулоза.
Во првите часови од почетокот на имунизацијата, вакцинирани се околу 400 граѓани. Меѓу нив и министерот за здравство Сашо Клековски.
„15 ноември е терминот за 26 илјади вакцини. Очекуваме информација да добиеме и за остатокот. Со овој тек мислам дека ќе стигнеме до 80 илјади планирани. Министерството прави напори да се обезбедат дополнителни количини за секој којшто сака да биде вакциниран“, изјави Клековски.
Вакцината е бесплатна за ризичните групи.
Освен во пунктовите и годинава мобилни медицински екипи ќе може да ги вакцинираат повозрасните и неподвижни лица во нивните домови.
Андријана Ѓурческа