Заштитени веб-страниците на Владата и министерствата од критичните ранливости во PHP
Веб-страниците на Владата и министерствата се навремено заштитени од критичните безбедносни ранливости во програмскиот јазик PHP, информира Министерството за дигитална трансформација. Преземени се превентивни мерки, применети безбедносни закрпи и ажурирања, а досегашните проверки не покажале индикации за успешен хакерски напад или компромитирање на системите.
Веб-страниците на Владата и министерствата се навремено заштитени од критичните безбедносни ранливости во програмскиот јазик PHP, соопшти Министерството за дигитална трансформација (МДТ).
По објавувањето на информациите за безбедносните пропусти, кои предизвикаа привремено исклучување на бројни владини веб-страници во Европа и во светот, биле преземени превентивни и технички мерки за заштита на системите.
Привремено бил блокиран надворешниот веб-сообраќај кон засегнатите системи, по што биле проверени софтверските верзии и биле применети соодветни безбедносни закрпи и ажурирања. Биле проверени и функционалноста и безбедноста на веб-сервисите.
Според досегашните проверки, не се утврдени индикации за успешно искористување на ранливостите или за компромитирање на веб-страниците на Владата и министерствата.
Од МДТ информираат дека преку Секторот за сајбер-безбедност и владиниот тим за одговор на компјутерски безбедносни инциденти (МКД-ГОВ-ЦСИРТ) продолжува засиленото следење на сајбер-заканите, анализата на безбедносните настани и лог-записите, како и проверката на потенцијалните индикатори за компромитирање.
Од Министерството посочуваат дека заштитата на владината дигитална инфраструктура останува приоритет, со цел да се обезбеди сигурно и стабилно функционирање на електронските услуги за граѓаните и компаниите.