Претседателски избори

Во Бугарија денеска се одржуваат претседателски избори на кои 6,59 милиони граѓани имаат право на глас. За функциите претседател и потпретседател се натпреваруваат 27 кандидатски двојки.

Избирачките места се отворени од 7 до 20 часот, а доколку има граѓани кои чекаат да гласаат, изборниот процес може да биде продолжен до 21 часот. Гласањето се спроведува машински на 9.373 избирачки места во земјата, додека бугарските државјани во странство можат да гласаат на 613 места во 60 држави.

Првите резултати од излезните анкети се очекуваат по затворањето на избирачките места, а официјалните резултати од првиот круг треба да бидат објавени до 27 октомври. Доколку ниту една кандидатска двојка не ги исполни условите за победа во првиот круг, вториот круг е закажан за 1 ноември.