Бензините поевтинуваат за 5 денари, дизелот останува со иста цена
Од полноќ бензините Еуросупер БС-95 и Еуросупер БС-98 ќе се продаваат по цени пониски за 5 денари за литар, додека цената на дизелот останува непроменета. Регулаторната комисија за енергетика донесе одлука за намалување на малопродажните цени на нафтените деривати во просек за 1,89 проценти.
Од ноќеска на полноќ се намалуваат максималните малопродажни цени на бензините, додека цената на дизелот останува иста, одлучи Регулаторната комисија за енергетика (РКЕ).
Според новата одлука, литар Еуросупер БС-95 ќе се продава по максимална цена од 91 денар, а Еуросупер БС-98 ќе чини 93 денари за литар, што претставува намалување од 5 денари.
Цената на Еуродизел БС (Д-Е V) останува непроменета и ќе изнесува 99 денари за литар. Екстра лесното масло за домаќинство поевтинува за 0,50 денари и ќе чини 110 денари за литар.
Од друга страна, цената на мазутот се зголемува за 0,694 денари за килограм и ќе изнесува 54,273 денари.
Од РКЕ посочуваат дека во одлуката се земени предвид движењата на референтните цени на нафтените деривати на светскиот пазар, како и промената на курсот на денарот во однос на доларот.
Утврдените цени се максимални, што значи дека трговците можат да ги формираат малопродажните цени и под утврденото највисоко ниво.