Студентскиот дом „Стив Наумов“ ги исполнува капацитетите, студентите задоволни од условите
Близу 1.200 студенти престојуваат во домот „Стив Наумов“ во Скопје. Велат дека имаат добри услови за учење и живеење, а раководството посочува дека тековните проблеми се санираат навреме и апелира за поголема грижа за заедничките простории.
Со целосно исполнет капацитет, „Стив Наумов“ е дом на близу 1.200 македонски студенти. Со современи услови за учење и живеење, комлетно обновени соби и модерна инфраструктура, студентскиот дом ги исполнува сите стандарди за квалитетно и достоинствено студентско домување. Условите во домот се одлични и ништо не недостасува, велат студентите коишто престојуваат таму.
Тековните проблеми, коишто не се невообичаени за волку големи објекти, навремено се санираат, вели директорот на државните студентски домови во скопје. Апелира, студентите соодветно да се грижат за личните и заеднички простории.
А во дворот на домот, повторно поставена бистата на патронот Стив Наумов, откако претходната беше украдена пред дестина години.
Стив Наумов е македонски народен херој којшто на само 22 години, по жестока и нерамноправна битка, одбивајќи да се предаде на бугарскиот окупатор, херојски си го одзема животот, избирајќи ја смртта пред заробеништвото.
Марија Котовска