Заврши гласањето за нов шеф на ОЈО ГОКК, во трка петтемина кандидати
Гласањето за нов шеф на Основното јавно обвинителство за гонење организиран криминал и корупција, заврши, во тек е пребројување на гласовите од јавни обвинители кои бираат меѓу петмината пријавени колеги.
Заврши гласањето на 187 јавни обвинители од целата држава за изборот на нов шеф на Обвинителството за гонење на организиран криминал и корупција. Со непосредно и тајно гласање одлучуваа кој од петтемина кандидати ќе го наследи Ислам Абази. Државниот обвинител Савески оцени дека сите се квалитетни обвинители, па кој и да победи ќе биде солиден избор.
Секој обвинител гласа за еден кандидат, а одлучува бројот на освоени гласови. Тричлена комисија од Советот на јавните обвинители на крајот на изборниот процес ќе ги сумира гласовите.
За довербата на колегите се борат Јован Цветановски и Трајче Пеливанов од Вишото јавно обвинителство Скопје, Лидија Раичевиќ од Основното јавно обвинителство Скопје, како и Искра Хаџи Василева и Фатон Азизи од Обвинителството за гонење на организиран криминал и корупција.
Анита Димитријевска – Велковска