Глигор Кондовски со визуелно-акустичниот перформанс „Звучна илустрација“ во „Центар-Јадро“
Музиката, филмот и визуелната уметност се спојуваат во авторскиот перформанс „Звучна илустрација“ на виолинистот, композитор и филмски автор Глигор Кондовски. Перформансот ќе биде претставен вечерва, во 19:30 часот, во КСП „Центар-Јадро“ во Скопје, низ седум тематски целини посветени на звукот и неговата визуелна интерпретација.
Виолинистот, композитор и филмски автор Глигор Кондовски вечерва во КСП „Центар-Јадро“ во Скопје ќе го претстави визуелно-акустичниот перформанс „Звучна илустрација“.
Настанот започнува во 19:30 часот, а програмата е составена од седум целини: „Интродукција“, „Одек во просторот“, „Звучен пејзаж“, „Прекршување“, „Видлив звук“, „Звучен судир“ и „После звукот“.
Кондовски е роден во 1980 година. Дипломирал виолина на Факултетот за музичка уметност и филмска и телевизиска режија на Факултетот за драмски уметности во Тетово. Магистрирал филмско и телевизиско сценарио на ФДУ во Скопје, а моментално е на мастер-студии по композиција.
Работи како педагог во ДМБУЦ „Илија Николовски – Луј“ во Скопје, а неговите ученици имаат освоено бројни награди на државни и меѓународни натпревари.
Неговите музички изданија се објавени за домашните издавачки куќи „Шарла“, „ПМГ Џез“ и „Аксиома“, како и за странски издавачи. Настапувал на фестивалите „Крај Вардарот џез“, „Скопско лето“, „Џез во градот“ и „Прилеп џез фестивал“.
Како филмски автор реализирал повеќе краткометражни и документарни филмови, прикажувани во земјава и во странство. Во 2022 година ја добил гран-при наградата за филмот „Белешка“ на Државниот фестивал на аматерски филм во Валандово, додека документарниот филм „Сонцето не грее на сите страни“ бил прикажан на „Астерфест“ во 2023 година.
Кондовски се занимава и со фотографија, а зад себе има повеќе самостојни изложби, меѓу кои „Тетовски џез моменти“, „На сцена“, „Сфера“ и „Импровизации“. Последната била претставена во „Центар-Јадро“ во Скопје и во „Порта Џез“ во Битола.