Лишени од слобода 13 лица во пет градови, полицијата заплени марихуана, прашкасти материи и таблети
Полициски акции на различни локации во Скопје, Прилеп, Демир Капија, Боговиње и Штип. Во текот на 30 и 31 октомври, полицијата лишила од слобода 13 лица на возраст од 18 до 46 години, кај кои биле пронајдени и одземени марихуана, бели прашкасти и грутчести материи, таблети и предмети со прашкаста содржина.
Тринаесет лица на возраст од 18 до 46 години биле лишени од слобода во изминатите два дена на различни локации во Скопје, Прилеп, Демир Капија, Боговиње и Штип. При полициските контроли и прегледи биле пронајдени и одземени марихуана, бела прашкаста и грутчеста материја, таблети и предмети со прашкаста содржина, информираат од Министерството за внатрешни работи.
Во Скопје, полициските службеници лишиле од слобода девет лица, откако кај нив биле пронајдени и одземени марихуана и бели прашкасти и грутчести материи.
Во Прилеп, затворската полиција при преглед на осудено лице во Казнено-поправната установа Затвор – Прилеп пронашла прашкаста материја, повеќе таблети во различни бои и предмети со прашкаста содржина.
Во Боговиње бил лишен од слобода 44-годишен жител на селото Пирок, кај кого била пронајдена марихуана.
Во Демир Капија полицијата привела 29-годишен жител на селото Корешница, кај кого при преглед биле пронајдени бела прашкаста материја и таблета. За настанот бил известен јавен обвинител.
Во Штип, пак, бил лишен од слобода 26-годишен скопјанец, откако полициските службеници забележале дека користи марихуана. Отпушокот што го фрлил бил пронајден и одземен.
Од МВР информираат дека по целосно документирање на случаите против лицата ќе бидат поднесени соодветни пријави.