Одземена лиценцата за работа на Алта банка од Белград

Народната банка на Србија соопшти дека, по спроведувањето на контролни активности и воведувањето привремени мерки, а со цел заштита на штедачите и другите доверители и спречување на ширење на какви било негативни ефекти врз економијата, ја одзема лиценцата за работа на Алта Банка Белград.

Се наведува и дека е утврдено да „во претходниот период, финансиската состојба на банката значително се влошила, и дека постои можност за нејзино дополнително влошување или ликвидноста на банката, со што се во опасност интересите на штедачите на банката“.

Како што е наведено, ќе се именува стечаен управник, а штедачите на банката ќе бидат навремено информирани од кои банки ќе ги подигнат своите депозити до осигурениот износ од 50.000 евра, како и за начинот на пријавување на нивните други побарувања.

Од Алта банка соопштија дека сите надлежни институции и органи за стечај преземаат потребни чекори за заштита на интересите на штедачите и доверителите, како и за спроведување на понатамошни законски процедури во согласност со српските прописи.

Клиенти на Алта банка беа Министерството за внатрешни работи, Електро стопанство на Србија, ЕР Србија и други.

Од здружението на српски банки соопштија дека финансискиот сектор на Србија е безбеден, ликвиден и добро капитализиран.

Алта банка е деветта банка по големината во Србија, со актива од 1,84 милијарди евра и држи 2,9% од пазарот. Останува непознато понатамошното работење на целата Алта групација, која е присутна во неколку деловни сектори меѓу кои се Идеа, Рода и Меркатор, градежништвото и недвижностите.

Алта во регионот има банки и осигурителни компании во Македонија, Црна Гора и БиХ. Сопственик на групацијата е Давор Мацура кој го започнал својот бизнис со менувачници.

Оливер Бранковиќ, дописник од Белград за МРТ