Бензините поскапуваат за два, дизелот за еден денар
Регулаторната комисија за енергетика донесе одлука за зголемување на малопродажните цени на нафтените деривати во просек за 1,55 отсто. Од полноќ, Еуросупер БС-95 ќе се продава за 93 денари, Еуросупер БС-98 за 95, а Еуродизелот за 100 денари за литар.
Од полноќ поскапуваат бензините за два денари, а дизелот за еден денар по литар, согласно одлуката на Регулаторната комисија за енергетика за зголемување на малопродажните цени на нафтените деривати во просек за 1,55 отсто.
Со новата одлука, литар Еуросупер БС-95 ќе чини 93 денари, додека Еуросупер БС-98 ќе се продава за 95 денари. Цената на Еуродизелот се зголемува за еден денар и ќе изнесува 100 денари за литар.
Без промена останува цената на екстра лесното масло за домаќинство, кое и натаму ќе чини 110 денари за литар. Мазутот поскапува за 1,300 денари за килограм, па новата цена ќе изнесува 55,573 денари.
При формирањето на цените, РКЕ ги примени владините одлуки за намалување на ДДВ за дизелот на 10 отсто, како и за намалување на акцизата за бензините за два денари, а за дизелот за четири денари по литар.