Македонија ги започнува квалификациите за ЕП 2028, вечерва против Луксембург

Македонската ракометна репрезентација вечерва во Скопје го игра првиот натпревар од квалификациите за Европското првенство во 2028 година. Противник на „црвено-жолтите“ е селекцијата на Луксембург.

Капитенот Филип Кузмановски очекува победа на домашен терен, но и позитивен резултат на гостувањето кај Грција во второто коло.

Тој истакнува дека репрезентацијата има континуитет на настапи на големите натпреварувања и дека новата генерација напредува и стекнува искуство.

„Македонија изминатиов период покажа еден континуитет на големите натпреварувања и сакаме да го продолжиме тоа. Искрено мислам дека напредуваме од првенство на првенство, се создаде една нова генерација, позрели сме, поискусни и нормално дека посакуваме сега да обезбедиме уште едно учество на Европско првенство“, изјави Кузмановски.

Натпреварот Македонија – Луксембург ќе се игра во спортскиот центар „Борис Трајковски“ во Скопје, со почеток во 19 часот, а преносот од натпреварот е на МРТ1.

Во вториот натпревар од овој квалификациски циклус, македонските ракометари в недела ќе гостуваат кај селекцијата на Грција.