Куманово: Пет лица заработија кривични пријави

Пет лица заработија кривични пријави по полициската акција за сузбивање на криминална група, која пет години дејствувала во Куманово. Лицата се осомничени за злосторничко здружување, вршење кривични дела, перење пари и изнуда. По предлог на Основното јавно обвинителство за гонење на организиран криминал и корупција, Основен кривичен суд Скопје донесе решенија со кои две лица завршија во притвор, поради постоење опасност од бегство, повторување или довршување на кривичното дело, како и влијание врз сведоци. Трето осомничено лице доби мерка куќен притвор, а на четвртиот му е определена мерка претпазливост, одземена патна исправа и забрана за издавање нова.

„Со предлогот на Јавното обвинителство е опфатено и петто лице, кое во моментот е недостапно за органите на прогонот. Против донесените решенија, странките имаат право на жалба до Кривичниот совет на Основниот кривичен суд Скопје“, информира Основен кривичен суд Скопје.

Групата со груби закани изнудувала пари од оштетени лица. Најчесто искористувајќи ја нивната зависност поради претходна позајмица. Изготвувале фиктивни договор за купопродажба, како гаранција за наводен заем.

„Пронајдени и одземени се меѓусебни договори за заем со нереално високи камати, договори за солемнизација на недвижен имот, поголема сума финансиски средства, патнички моторни возила, мобилни телефони и други електронски уреди. Д.П. заедно со З. Р принудувал оштетено лице да преземе дејствие на штета на својот имот“, истакна портпаролот на МВР, Гоце Андреевски.

На дел од договорите осомничените фалсификувале потписи на оштетени лица. Без нивно знаење ги завериле на нотар. Нотарот кој дозволил да се заверат лажните документи е осомничен за несовесно работење во службата.

Елена Георгиевска