Македонската литература на светскиот Саем на книгата во Франкфурт под мотото „Куќа на зборови, куќа на светови“

По Гетеборг, македонските книжевници ќе учествуваат на најголемиот светски Саем на книгата во Франкфурт. Манифестацијата која има 65-годишна традиција е исклучителна можност за промоција и за презентација на врвните дострели на македонските автори. Македонија на саемот ќе има специјално дизајниран штанд и ќе понуди публикација со избор и превод на кратки извадоци од творештвото на 18 македонски автори.

„На саемот накнига во Франкфурт, кој ќе се одржи од 8 до 12 октомври Здружението на издавачи и книжари ќе ја претстави Република Македонија со еден интересен концепт под мотото „Куќа на зборови, куќа на светови“, рече министерката за култура, Елизабета Канческа-Милевска

Претседателот на здружението на издавачите и книжарите на Македонија, Лазаревски е задоволен што по неколку години пауза, повторно ќе ја има улогата на комесар во Франкфурт.

„Авторите кои ќе бидат претставени во Франкфурт се академик Луан Старова, исткантиот поет Никола Маџиров и писателката Лидија Димковска, која е добитничка на Европската награда за литература“, рече Горјан Лазаревски, претседател на ЗИКМ.

Концептот на претставувањето првпат е осмислен од универзитетски професори по литература. Осумнаесеттемина автори се распоредени во три сегменти, секој со различна тема и поврзан со познати мотиви од културното наследство. По Франкфурт, претстои и учество на саемот во Истанбул, од 8 до 16 ноември, каде што комесар на земјава ќе биде Сојузот на албанските издавачи.

Александра Перевска