Раст на бројот на туристи во првите девет месеци од годинава
Туристичкиот промет во земјава бележи раст во првите девет месеци од годинава. Според податоците на Државниот завод за статистика, од јануари до септември бројот на туристи е зголемен за 3 проценти, а на ноќевањата за 3,5 проценти во споредба со истиот период лани. Во септември најголем дел од странските туристи биле од Турција, Србија и Германија.
Во септември годинава во земјава биле регистрирани 136.305 туристи, кои оствариле вкупно 264.370 ноќевања, покажуваат податоците на Државниот завод за статистика.
Од вкупниот број туристи, 75,1 процент биле странски, а 24,9 проценти домашни туристи. Кај остварените ноќевања, 66,2 процента биле од странски, а 33,8 проценти од домашни туристи.
Според земјата на потекло, најбројни меѓу странските туристи во септември биле гостите од Турција, од каде пристигнале 27.933 туристи. Следуваат Србија со 8.358, Германија со 6.633 и Полска со 4.656 туристи.
Во периодот од јануари до септември 2026 година, вкупниот број туристи е зголемен за 3 проценти во споредба со истиот период лани. Притоа, бројот на домашните туристи бележи раст од 2,8 проценти, а на странските за 3 проценти.
Раст е забележан и кај ноќевањата. Во првите девет месеци од годинава тие се зголемени за 3,5 проценти, при што кај домашните туристи растот изнесува 2,4 проценти, а кај странските 4,6 проценти.