Остра критика за вештачењето во случајот „Пулс“
Градежниот експерт Горан Марковски со сериозни забелешки за вештачењето на одбраната на Дејан Јованов. Оцени дека е селективно, со многу пропусти и дека градежните зафати во „Пулс“ претставуваат реконструкција. Судскиот процес продолжува со сослушување на сведоци на одбраната.
Нагласена селективност, инженерска алхемија и стручна само-дисквалификација. Вака градежниот експерт Горан Марковски го опиша вештачењето што го презентираше одбраната на газдата на „Пулс“, Дејан Јованов. Деканот на Градежниот факултет оцени дека вештачењето содржело многу пропусти, а се ценеле само фактите што одат во прилог на одбраната. Според Марковски, нема друга вистина освен онаа дека градежните зафати во „Пулс“ потпаѓаат под реконструкција.
„Причината за трагедијата и сржта на проблемот лежат во генетскиот состав на градбата на објектот и непочитувањето на законската регулатива. Дали може без одобрение на надлежниот орган, без проект и без спроведена постапка оваа судница да ја пренамениме во дискотека? Секако дека не може!“, изјави Горан Марковски, вештак на Јавното обвинителство.
Ставот на родителите е дека газдата на клубот преку спорно вештачење сака да ја релативизира одговорноста.
Процесот продолжува со сослушување сведоци на првообвинетиот Јованов. Најавени се шеснаесетмина: вработени во општината, во МВР и во противпожарната станица.
Анита Димитријевска-Велковска