Во Љубојно отворен погон за праработка на јаболка
Пионерска приватна инвестиција во ресенското село Љубојно која ќе значи спас за пласманот на јаболкото од пониските класи. Погонот во кој се вложени 150 илјади евра засега ќе произведува сок, а во план е проширување на асортиманот. Од ова овошје можат да се произведуваат многу здрави и нови производи...
Од јаболкото може да се добијат над 50 производи. За жал, во Преспа, во која годишно се добиваат и до 100.000 тони јаболко, се уште не се изградени погони за преработка на јаболко, освен за сок и концентрат од јаболко. Можеби, новиот погон во Љубојно, кој покрај сок во иднина ќе произведува и чипс, киселина и јаболково вино, ќе привлече и други инвеститори, во таа насока.
„Да ги вработиме невработените, да ги задржиме младите луѓе. Ние почетно ќе вработиме до 10 луѓе во фабриката, а вршиме и откуп на конзумно јаболко“, вели инвеститорот Љупчо Стојковски.
Ова е добар пример за заживување на малото стопанство во општината, а посебно радува фактот што оваа инвестиција е отворена во Љубојно, село од кое во голем број на жители се одселени, со што би се овозможило на некој начин и перспектива на младото население во ова село.
„Со една огромна желба и волја на инвеститорот овој објект успеа да се реконструира и да се овозможи да се отвори овој капацитет за преработка на јаболка“, изјави градоначалнкиот на Ресен, Ѓоко Стрезовски.
Аир од овој погон очекуваат и овоштарите.
„Среќен сум што вакви инвестиции се отвораат во Преспа и дај боже што повеќе да ги има“, вели еден овошар од Љубојно.
Инвестицијата чини 150.000 евра, а се очекуваат и нови вработувања.
Сандре Темелковски