РКЕ

Пониски цени на горивата од полноќ

16.11.2026 14:48

Се намалуваат цените на сите нафтени деривати, одлучи Регулаторната комисија за енергетика. Бензините ЕУРОСУПЕР БС-95 и БС-98 поевтинуваат за два денара за литар, дизелот за два и пол, а екстра лесното масло за три денари. Просечното намалување на малопродажните цени изнесува 2,43 проценти.

Од ноќеска на полноќ се намалуваат малопродажните цени на нафтените деривати, одлучи Регулаторната комисија за енергетика. Новите цени на бензините ЕУРОСУПЕР БС-95 и БС-98 ќе бидат пониски за два денара за литар, а дизелот поевтинува за два и пол денара.

Со одлуката, литар ЕУРОСУПЕР БС-95 ќе се продава по максимална цена од 84 денари, ЕУРОСУПЕР БС-98 ќе чини 86 денари, а дизелот 92 денари.

Екстра лесното масло за домаќинство поевтинува за три денари и новата максимална цена ќе изнесува 100,50 денари за литар. Цената на мазутот се намалува за 0,998 денари за килограм и ќе изнесува 48,314 денари.

Од РКЕ информираат дека просечното намалување на малопродажните цени изнесува 2,43 проценти во споредба со претходната одлука од 9 ноември.

Намалувањето се должи на пониските референтни цени на нафтените деривати на светскиот пазар. Во пресметката се применети и владините мерки за намалување на ДДВ за дизелот на 10 проценти, како и намалување на акцизите за бензините и дизелот.

Од Комисијата појаснуваат дека утврдените цени се максимални, што значи дека трговците можат да ги продаваат нафтените деривати и по пониски цени.