35 години од донесувањето на Уставот на Македонија
На денешен ден, пред 35 години, на 17 ноември 1991 година, Собранието на Република Македонија го донесе првиот Устав на независната македонска држава, со што беа поставени темелите на нејзиното уставно-правно уредување.

Уставот беше донесен на 17 ноември 1991 година, само неколку месеци по референдумот за независност, и ги утврди основните принципи врз кои се темели државата – суверенитетот, демократијата, владеењето на правото, поделбата на власта, како и заштитата на човековите права и слободи.
Со неговото усвојување беа дефинирани надлежностите на законодавната, извршната и судската власт, организацијата на институциите, локалната самоуправа и уставните гаранции за правата на граѓаните, поставувајќи ја правната рамка за функционирањето на независната држава.
Во изминатите три и пол децении Уставот беше менуван осум пати, преку вкупно 36 амандмани, со цел негово усогласување со политичките, општествените и институционалните промени.
Првите измени беа донесени во 1992 година, а потоа следуваа измени во 1998 година. Најобемната уставна ревизија беше спроведена во 2001 година, кога беа усвоени амандманите произлезени од Охридскиот рамковен договор, со кои беа направени значајни промени во уставниот поредок.
Дополнителни измени следуваа во 2003, 2005, 2009 и 2011 година, најмногу во делот на правосудството и унапредувањето на институционалниот систем.
Последните уставни измени беа усвоени на 11 јануари 2019 година, кога со амандманите XXXIII до XXXVI, согласно Преспанскиот договор, уставното име на државата беше променето во Република Македонија.
И по 35 години од неговото донесување, Уставот останува највисокиот правен акт на државата и основата врз која се темелат функционирањето на институциите, законодавството, владеењето на правото и заштитата на правата и слободите на граѓаните.
По повод 35-годишнина од првиот Устав, денеска во законодавниот дом ќе се одржат низа панел-дискусии на кои ќе се дебатира за донесувањето на највисокиот правен акт и осамостојувањето на државата.
