Група „764“ таргетира деца

20.11.2026 12:45

„764“ - насилна онлајн заедница, чии членови таргетираат деца, малолетници и други ранливи лица со цел да ги манипулираат, заплашуваат и принудуваат на опасни и насилни дејствија.

Децата на удар – родители, внимавајте! МВР предупредува – насилна заедница „764“ оперира и во Македонија. Главна цел им се младите. Ги наоѓаат преку најкористените платформи и игри: Телеграм, Роблокс, Инстаграм, ТикТок, Снепчет, Редит, Икс, Мајнкрафт и Фортнајт, и на тој начин воспоставуваат контакт со потенцијалните жртви.

Прв знак за родителите треба да бидат ненадејните промени во однесувањето на децата: повлекување во себе, страв, вознемиреност или раздразливост, зголемена таинственост при користењето на мобилниот телефон или компјутерот, интензивна комуникација со непознати лица преку социјалните мрежи и платформите за онлајн игри, примање заканувачки пораки, велат од МВР.

Според Министерството, единствени кои можат да ги заштитат децата се родителите. Тие треба постојано да разговараат со своите најмили за активностите на интернет и да покажат интерес за тоа со кого комуницираат и какви содржини следат, но и да ги едуцираат за споделувањето лични податоци, лозинки и интимни фотографии со непознати лица.

Доколку имате сознанија, информации или сомнеж за вакви активности поврзани со групата „764“ или други слични насилни онлајн групи, МВР апелира веднаш да го пријавите случајот и да не преземате активности на сопствена рака.

Викторија Милевска