Раст на депозитите и кредитите во октомври – годишниот раст на кредитната активност достигна 14,3 проценти
Вкупните депозити во октомври се зголемиле за 9,3 проценти на годишно ниво, додека кредитната активност бележи раст од 14,3 проценти, покажуваат податоците на Народната банка. Забрзан е и растот на депозитите на населението, кои на годишно ниво се повисоки за 9,4 проценти.

Раст на депозитите и кредитите во октомври годинава. Според најновите податоци на Народната банка, вкупните депозити се зголемиле за 0,5 проценти на месечно и за 9,3 проценти на годишно ниво.
Месечниот раст во целост произлегува од зголемувањето на депозитите на домаќинствата, додека годишното зголемување се должи на растот на депозитите и кај домаќинствата и кај корпоративниот сектор.
Кредитната активност во октомври забележала месечен раст од 0,7 проценти, додека на годишно ниво е повисока за 14,3 проценти. Зголемувањето се должи на повисокото кредитирање на двата сектора, со поизразен придонес на корпоративниот сектор.
Депозитите на населението се зголемиле за 1,3 проценти на месечно и за 9,4 проценти на годишно ниво. Раст бележат и орочените депозити на домаќинствата, кои на месечна основа се повисоки за 0,6 проценти, а на годишна за 5,7 проценти.
Кредитите на населението во октомври пораснале за 0,7 проценти на месечно и за 12,6 проценти на годишно ниво. Продолжува растот и на потрошувачките и на станбените кредити. На месечно ниво двата вида кредити бележат раст од 0,9 проценти, додека на годишно ниво потрошувачките се повисоки за 12,3 проценти, а станбените за 15,9 проценти.
Кај корпоративниот сектор, депозитите се намалиле за 0,7 проценти на месечно ниво, но на годишна основа бележат раст од 9 проценти. Кредитите на претпријатијата се зголемиле за 0,8 проценти во однос на претходниот месец, додека годишниот раст изнесува 16,1 процент.
Паричната маса во октомври забележала месечен раст од 0,5 проценти, а на годишно ниво е зголемена за 8,9 проценти, покажуваат податоците на Народната банка.
