Демографските предизвици бараат поголема грижа и инвестиции во децата
Помалку од половина од децата до шестгодишна возраст во земјава се опфатени со предучилишно образование. По повод Светскиот ден на детето, УНИЦЕФ повика на поголеми инвестиции во раниот детски развој и создавање еднакви можности за сите деца. Надлежните најавуваат проширување на мрежата на градинки и подобрување на условите за учење и развој.

Македонија се соочува со сериозен демографски предизвик – намалување на наталитетот. Создавањето услови за развој на децата е приоритет – предупредува УНИЦЕФ. Помалку од половина од децата до шестгодишна возраст се опфатени со предучилишно образование, а најпогодени се оние од социјално ранливите семејства.
„За децата, тоа значи поголеми шанси за успех во образованието и животот, како и прекинување на кругот на неповолност и сиромаштија. За родителите, поголеми можности за вклучување на пазарот на труд“, изјави Лесли Милер – претставничка на УНИЦЕФ.
Мрежата на детски градинки се проширува – посочува министерот за социјална политика, Велковски. Со едносменската настава во училиштата се обезбедува повеќе време за учење и дружење на децата, вели министерката за образование.
„Но, не е доволно само повеќе места во детските градинки, подеднакво важно е секое дете да добие квалитетна поддршка, соодветна грижа и поттикнувачка средина за учење и развој“, рече Ѓоко Велковски – министер за социјална политика, демографија и млади.
„Со воведувањето на едносменската настава и проширувањето на продолжениот престој во училиштата, на децата им обезбедуваме повеќе време за учење, дружење, спорт, креативност и развивање на нивните интереси“, додаде Весна Јаневска – министерка за образование и наука.
Со симболично ѕвонење на берзанското ѕвонче беше испратена порака дека инвестирањето во децата е и инвестиција во иднината.
„Децата се утрешните работници, потрошувачи, но и иноватори и лидери. Сепак, ова сè уште не е доволно препознаено во деловниот свет“, изјави Иван Штериев – директор на Македонската берза.
20 ноември, Светскиот ден на детето, се поврзува и со Декларацијата и Конвенцијата за правата на детето.
Андријана Ѓурческа
