Македонија од Лвов се врати со незаслужен пораз

Македонската фудбалска селекција се врати од Лвов само резултатски поразена но со позитивно чувство за горделивото издание во пеколната украинска арена. Избраниците на селекторот Бошко Ѓуровски одиграа и фудбалски и спортски  храбро и дрско, исполнувајки ја во најголем дел поставената стратегија.

Тој пристап против фаворизираниот противник  не го искористиме за да ја напуштиме Украина непоразени, и затоа останува да тагуваме по пропуштените шанси.Како никогаш досега ако ги исклучиме гостинските изданија на нашата фудбалска селекција против Англија на Сент Мери во Саутемптон и на Олд Трафорд во Манчестер, имавме карактер и храброст да нападнеме и да создадеме надмоќ и да му се приближиме на бодот.

Иако влеговме како тотални аутсајдери, во најголем дел од двобојот бевме рамноправни, на моменти и подобар тим, иако во последните моменти доживеавме непријатен психолошки момент. Среќата во овој случај не беше со храбрите, реализација остана стара болка, не ги искористивме шансите и нашите репрезентативци  ја почувствуваа суровоста на непишаното фудбалско правило.

Разочарувањето мора брзо да се претвори во нова енергија и зацврстување на вербата дека ова е вистинскиот пристап. Офанзивно, со многу трчање, со срце, борба и самодоверба, на сите и до крај.

Простор за корекции и создавање на модерна физиономија секогаш има и му се неопходни на овој состав во оваа фаза. Против Словачка во ноември во Скопје потребна му е и подршка како во Лвов каде што бучната, и верна украинска публика успеа да ги мотивира и нашите играчи.