Аџиите се вратија, престојат редовни контроли и следење на здравствената состојба
Аџилакот заврши. Аџиите се враќаат дома. Сега за нив претстои период на редовни контроли и следење на здравствената состојба од страна на епидемиолозите. Лекарските тимови се подготвени, а аџиите соработуваат.
И аџиите од полошкиот регион деновиве се вратија дома. Тие Курбан Бајрам го прославија во Медина, во Саудиска Арабија.
Претстојат редовни контроли и следење на здравствената состојба. Досега не се забележани симптоми на некоја заразна болест.
И во гостиварската болница се вршат разговори и прегледи со секој од 70-те овдешни аџии.
„Надзорот го вршиме 21 ден, покрај оној редовен здравствен надзор на колера кој трае 5 дена, на маларија кој трае шест недели, како и мерс корона вирусот и ебола вирусот од 21 ден“, изјави примариус доктор Воислав Огњаноски, епидемиолог.
Пред заминувањето на аџилак биле преземени сите потребни мерки.
„Ние кога тргнавме од овде примивме вакцина и таблети, се како што треба, зошто тоа е важно са нас, за околината и за семејството“, вели Афет Беадини, водич на аџиите.
Аџиите се јавуваат на задолжителните контроли. Задоволни се од гостопримливоста во Медина.
„Се беше како што треба, многу добро беше. И благодариме на таа земја, многу убаво се однесуваа, ретко се случува и изненадени сме. Се е во ред“, рекоа аџиите со кои поразговаравме.
Според надлежните и Здравствените домови од регионов се подготвени за справување со евентуална појава на заразни болести. Набавена е потребната опрема, а има и обучени тимови.
Зоран Јованоски