Обрван со проверени сили

Селекторот на македонската машка ракометна репрезентација Ивица Обрван објави список со 20 играчи за натпреварите со Швајцарија и со Чешка, со коишто за десетина дена нашиот тим ќе ги почне квалификациите за  ЕП во 2016.

Во период кога репрезентативците досега сезонава се со повеќе од скромна, дури и оскудна минутажа во Металург и во Вардар, новата квалификациска одисеја Македонија ќе ја почне само со Кирил Лазаров и со Борко Ристовски како интернационалци. Сите други играчи на списокот, со исклучок на Златко Мојсоски од Прилеп, се од нашите најдобри клубови, вклучувајќи ги и надежите на Металург Нелоски и Талески.

Покрај нив и Кире Лазаров, за надворешната линија стандардно ќе конкурираат Наумче Мојсовски, Миркуловски, Филип Лазаров, Јоноски, Велко Маркоски и неодамна натурализираните Прибак и Вугринец. Димовски, Стоилов и Никола Марковски ќе бидат триото кружни напаѓачи, Георгиевски и Златко Мојсоски десни, Манасков и Ојлески леви крила, а заедно со Ристовски, место меѓу стативите ќе очекуваат и Ангелов и Митревски.

Покрај овие дваесетмина, Обрван додаде и уште осуммина на поширокиот список, коишто би можел да ги повика ако затреба. На „стенд бај“ се: Даскалоски, Недановски, Јовчевски, Пешевски, Стојчевски, Митков, Мајнов и Димитриевски.

Македонија го почнува циклусот против Швајцарија во скопје на 29-ти овој месец, по што на 2-ри ноември ќе гостува во Чешка.