Започна вакцинацијата против сезонски грип
Вакцинацијата ги покрива сите типови на вирусот на грипот што циркулираат во северната хемисфера, вклучувајќи ги европоскиот регион и нашата држава...
Почна сезоната за превенција од грипот. Славица Пејковска четврта година по ред се имунизира. Има повеќе хронични заболувања.
„Пред да почнам да се вакцинирам имав многу силен грип и последици од него. Тоа ме натера да се вакцинирам“, рече Славица Пејковска.
Само изутрината, 150 граѓани се вакцинирале во Центарот за јавно здравје. Оние што повеќе години ја практикуваат, имаат позитивно искуство.
„Стално грипот го чувствував, а сега откако почнав да примам вакцина петта година го немам осетено.“
„Ме штити затоа што сум со многу дијагнози“, велат анкетираните граѓани.
Најчесто грипот има лесна клиничка слика, но може да има и посериозни последици. Затоа докторите апелираат до хронично болните.
„Од епидемиолошки индикации треба да се вакцинираат лица кои пружаат нега на мали деца или возрасни, лица кои се во затворени колективи, особено се препорачува за здравствени работници. Што повеќе население ќе се вакцинира поголем е општиот колективен имунитет и ќе има помалку последици по здравјето и на тие што не се вакцинирани“, рече д-р Лилјана Лазаревска од Центарот за јавно здравје.
Оваа година набавени се 30 илјади дози. Една вакцина чини 400 денари.
Вакцинацијата ги покрива сите типови на вирусот на грипот што циркулираат во северната хемисфера, вклучувајќи ги европоскиот регион и нашата држава.
Андријана Атанасовска