За социјално загрозените првите решенија за легализација идната недела

Социјално загрозените семејства во државава идната недела ќе ги добијат првите решенија за  бесплатно легализираниот имот. Државата на свој трошок им направи и решенија и елаборати.

„Досега има поднесено околу 900 барања, а изготвени се околу 300 елаборати за легализираните објекти. Наредната недела веќе ќе почнеме со врачување на тие решенија. Значи, за соијално ранливите категории н граѓани бесплатни се и елаборатите и легализирањето на домовите“, вели министерот за транспорт и врски Миле Јанакиески.

Легализацијата е до 31 декември наредната година. Има и доста готови елаборати што стојат во геодетските фирми.

Досега во државава се легализирани преку 105.000 објекти што е една третина од поднесените барања на граѓаните. Процесот се ажурира и со законски измени. Ќе може да се легализираат  покрај магистрални и регионални патишта и за 10 насто е намалена цената на елаборатите. Од Министерството за транспорт и врски констатираат – многу зависи и од ажурноста на општините.

Граѓаните емотивни со тапиите в раце, прв пат по повеќе децении.

„Најубаво е. Да им оставам на синовите. Чиста работа“, вели Босилка Трајаноска од Прилеп.

„Сега е секој свој на своето и од денеска сум, фактички газда на она што сум го направил пред 30 години“, вели Менде Костоски од прилепското село Беровци.

Со 6.500 легализирани имоти, Прилеп е меѓу првите. Легализацијата ќе ги активира економските капацитети и индустриските зони и ќе го забрза донесувањето на генералниот урбанистички план на градот.

Елизабета Митреска