Голем потенцијал за извоз на свежа храна и вино во Шведска

Со помош на шведска владина агенција „Опен трејд гејт Свидн“ се одржува семинар на кој 24 македонски компании се запознаваат со можностите за извоз на свежа храна,овошје и зеленчук на шведскиот пазар. Станува збор за специјализирани домашни компании кои веќе извезуваат прехранбени производи на европскиот пазар.

Шведски експерти ќе ги запознаат македонските извозници со потенцијалот и потребите на тамошните увозници, како и со стандардите што се бараат од производителите. Амбасадорот Страфансон смета дека има голем потенцијал затоа што Македонија произведува квалитетна храна.

„Може многу повеќе да се направи. Шведска е мошне отворен пазар и увезува многу свежа храна. Шведските купувачи се отворени и сакаат да вкусат нови производи што доаѓаат од други земји. Квалитетот на вашата свежа храна, овошјето, зеленчукот и виното се многу високи и се надевам дека овој семинар ќе придонесе да се зголеми нашиот увоз од Македонија, односно свежо овошје, зеленчук, храна и вино на шведскиот пазар“, изјави Матс Страфансон, амбасадор на Кралството Шведска во Република Македонија.

Еден од најголемите добавувачи на вина во Шведска кој е одговорен за цела Скандинавија е заинтересиран за македонските вина, особено за вранецот.

„Пред два дена македонските вина влегоа на листата на еден од најголемите шведски добавувачи на вина, кој е одговорен за цела Скандинавија и ова го сметаме  како позитивен сигнал и веруваме дека и останатите производители ќе го постигнат истиот ефект“, изјави Климент Шеќеровски, заменик директор на Агенцијата за странски инвестиции и промоција на извозот.

Свето Николовски