Подобар впечаток, но пак пораз!

МЗТ Скопје го претрпе петтиот пораз во Јадранската лига сезонава, иако на паркетот на Партизан остави подобар впечаток во споредба со гостувањата во Подгорица и во Ново Место. Во „Пионир“ на крајот на натпреварот на семафорот пишуваше 65-50, иако македонскиот првак почна одлично, а до 25-тата минута имаше рамноправен резултат.

Првиот период заврши со 15-11 за „сините“ од Аеродром, на полувремето беше 29-29, но во продолжението МЗТ не го одбрани рекетот, дозволи голем број на офанзивни скокови на црно-белите, не успеа да го консолидира ударот за три поени, па на крајот поразот беше неминовен.

Дамјан Стојановски даде десет коша и беше единствениот со двоцифрен показател во оваа статистичка категорија. Лучиќ и Маринковиќ постигнаа по седум  поени, а Николовски, Класен и Диксон по пет. Кај Партизан најпрецизен беше Вања Маринковиќ со 20 коша, Милутинов заврши со девет, а Богдановиќ со осум.

МЗТ Скопје сега има биланс 2-5, а третата победа во АБА друштвото ќе ја бара на домашен паркет во наредното коло, кога на 17-ти овој месец во „Јане Сандански“ ќе гостува Металац.