ММФ: Македонската економнија е над просекот во регионот

Растот на македонската економнија е над просекот во регионот, силното темпо ќе продолжи и наредната година. Ова е генералната оценка на мисијата на Mеѓународниот Mонетарен Fонд по двонеделното скенирање на економијата. Гостите од Вашингтон очекуваат економијата да порасне за 3,5%, што е иста прогноза како и владините проекции.

„Порастот е над просекот во регионот, и е проектиран да изнесува околу 3,5 проценти во 2014 година и незначително да се зајакне во следната година. Растот исто така е побалансиран - го одразува зголемениот извоз како и зголемената домашна побарувачка. Домашните инвестиции се поддржани со јавни инфраструктурни проекти, приватната потрошувачка е исто зголемена заради зголемениот раст на кредитите, растот на вработувањето и зголемените реални плати и пензии“, изјави Ивана Владкова Холар.

Гувернерот на Народната банка, Димитар Богов вели дека монетарната политика ќе ги следи движењата за да ја задржи рамнотежата и да креира услови за висок економски раст.

„Во најголем дел нашите видувања за развојот на македонската економија и за економските политики се доста слични, така што тоа ни укажува дека сме во добра насока. Монетарната политика продолжува внимателно да ги следи сите движења во македонската економија и соодветно ќе се прилагодува во наредните години, се со цел да се задржи рамнотежата која е присутна во македонската економија и на тој начин да создаде едни стабилни макроекономски услови за продолжување на развојот на економскиот раст“, изјави гувернерот Богов.

Македонската влада останува фокусирана на капиталните проекти, привлекувањето странски инвестиции, како и зголемување на извозот..Надлежните велат буџетските приходи се на планираното ниво, денарот останува стабилен, обезбедена е кредитна поддршка за фирмите.

Билјана Василева-Трендафилова